Uniun

Historia dall’Uniun da harmonicas Cadi

L’Uniun da harmonicas Cadi ei vegnida fundada ils 15 d’avrel 1981 da nies dirigent d’honur Gion Giachen Capaul da Trun. Ella ei sepresentada a fiastas orientalas, federalas, fiastas da famiglia/fatschenta e concerts annuals.

Da lez onns dumbrava l’uniun 38 commembers/-ras e dasperas haveva l’uniun aunc la formaziun dils giuvenils cun rodund 15 commembers/-ras. Gion Giachen Capaul ha dirigiu e menau siu orchester digl onn 1981 entochen igl onn 1995. Silsuenter ha el surdau la bigetta alla commembra Yvonne Monn-Monn da Sumvitg. Lezza ha dirigiu igl orchester entochen igl 2001 e surdau alura a David Giger da Zignau che ha dirigiu entochen igl onn 2009. Igl onn 2009 dumbrava igl orchester aunc 16 commembers/-ras. Suenter la fiasta federala a Herisau nua che l’Uniun da harmonicas Cadi ei separticipada cun success ha la mesadad dils commembers/-ras bandunau l’uniun. Ei ha dau ina interrupziun da biebein in onn. Igl onn 2011 han ils 7 dels restonts puspei concertau avon publicum e quei cun oreifer bien resun. Aschia ch’ei ha motivau els da trer il car vinavon. Actualmein dumbrein nus 9 commembers/-ras. Rinforzai vegnin nus da nies coach Martin Monn sco era d’in keyboarder, in batterist e nies bandierel. Nossa commembra la pli giuvna dumbra 16 onns e nies senior 73 onns. Nus havein in grond plascher ch’ina dallas fundaturas numnadamein Marlies Venzin-Bundi secatta aunc en nies miez. L’uniun da harmonicas Cadi ei la suletta formaziun da quei gener egl entir cantun Grischun.

In eveniment special ed unic ha l’Uniun da harmonicas Cadi organisau e menau atras igl onn 2006 numnadamein la fiasta d‘accordeon dalla svizra orientala e quei a Mustér. La fiasta ei stada in cumplein success ed ha schau anavos biars fastitgs positivs cunzun tiels participonts dalla bassa. Tgi havess da lez temps semiau che l’Uniun da harmonicas Cadi menass 10 onns pli tard atras ina fiasta federala d’accordeon? Buc olma da carstgaun. Pertgei ensasez havess la proxima fiasta federala giu da vegnir organisada en in’autra regiun. Denton quella regiun ha buca saviu anflar in’uniun organisonta. Aschia ha il president dall’Uniun da harmonicas Cadi Flavio Murer dau d’entellir che l’uniun fussi promta da surprender l’organisaziun. Quei han ils responsabels d’Accordeon Sivzra buca schau dir duas gadas ed immediat fatg las adattaziun neccessarias per saver surdar la fiasta federala 2016 all’Uniun da harmonicas Cadi che fuss dil reminent vegnida vidlunder per en ca. 20 onns. En vesta a quella fiasta federala ha Mustér era saviu organisar la radunonza da delegai dad Accordeon Sivzra che ha giu liug ils 21 da mars 2015 en sala da Peter Kaiser ella claustra da Mustér. La fiasta federala d’accordeon ha liug dils 3 entochen ils 5 da zercladur 2016 a Mustér. Gest il medem temps sa l’Uniun da harmonicas Cadi festivar il giubileum da 35 onns. Per ils organisaturs vegn la fiasta ad esser ina gronda sfida ch’ei mo da dumignar cun forzas unidas e bia gidonters. Nies pensum ha entschiet e nus selegrein d’astgar organisar quella fiasta segirafranc unica da quei gener en nossa regiun muntagnarda.

Sin seveser entochen sil pli tard ils 3 da zercladur 2016.