Chor d’affons Sumvitg

Il Chor d’affons vischnaunca Sumvitg ei vegnius fundaus igl onn 1998. Il chor promo¬va en emprema lingia la producziun da canzuns seigi quei en lungatg romontsch ni en lungatgs jester e possibilitescha era da presentar quellas. Plinavon promova il chor il plascher per il cantar e la ritmica. Aschia retschercan ils affons lur vusch e lur tgierp sco instrument.

Il Chor d’affons vischnaunca Sumvitg dumbra actual 42 cantaduras e cantadurs ella vegliadetgna denter 9 ed 16 onns. Ils affons derivan dallas vischnauncas da Sumvitg, Trun, Mustér, Tujetsch e Vella. Il chor vegn dirigius cun grond success da Flavia Walder e quei gia naven digl onn 2006.

Ils puncts culminonts dil chor dils davos onns ein segiramein stai la presentaziun dil musical “Pamplona” en atgna reschia egl onn 2008, dil teater musical “BLING BLING” sut la reschia da Jürg Gautschi egl onn 2013, ils concerts annunals la primavera ni d’Advent sco era las fetg bialas presentaziuns a caschun dallas fiastas da cant. Seigi quei stau a caschun dalla fiasta da cant districtuala a Glion (2011) ed a Salouf (2014) ni era alla fiasta cantunala a Trun (2012). Plinavon ei la canunzun “il siemi” da Gion Balzer Casanova ch’il chor ha registrau cun igl ensemble Decanto vegnida giavischada il pli bia digl auditori da radio romontsch igl onn 2011 e 2012. Medemamein in’aventura tut speziala pil chor ein las representaziuns dil lungatg romontsch ell’entira Svizra seigi quei sur las undas da radio romontsch sco era l’emissiun da Nadal 2011 ch’ei vegnida emessa sin SF1.