Chor baselgia Segnas

Sur dil Chor Baselgia Segnas alla cuorta:

L’ emprema uiara mundiala ha era schau anavos fastitgs legreivels, silmeins a Segnas. Biars giuvens che han prestau survetsch activ duront quels onns – per ordinari eran ils Romontschs ensemen – han empriu da cantar. Perquei han ins clamau quels giuvens in di dil meins da november 1917 per discutar schebein ei fussi d’ interess da fundar in chor baselgia, quei ch’ ei era succediu la medema sera. Scolast Ludivic Huonder ei sepurschius da mussar da cantar, Heinrich Stiefenhofer e Gion Antoni Durschei han surpriu il tgamun dalla nova uniun. Beinspert han ins entschiet culs exercecis. All’ entschatta cantavan ins canzuns profanas e pli tard era canzuns sacralas.
L’ emprema producziun ha il chor baselgia dau ina sera avon la fiasta dall’ Immaculata ils 7 da december 1917 ad Acletta. Suenter igl exercezi a Segnas seigien tuts se­rendi in davos l’ auter, ei vevi dau neiv e la via eri mo graschla, viers Acletta. Allas diesch dalla sera hagien ils cantadurs schau udir plein forza treis canzuns.
Ils da Segnas han udiu „lur cantadurs“ per l’ emprema gada da sogn Bistgaun, ils 20 da schaner 1918. Suenter messa ha il chor cantau entginas canzuns e raccoltau in grond applaus.
Il Chor Baselgia da Segnas ha fatg part a diversas fiastas da cant nua ch’ ils cantadurs han cuntonschiu il pli savens fetg buns resultats. Ils 27 da november 1921 vegnan las stautas dil Chor Baselgia da Segnas ac­ceptadas.
1923 ei stau creisma a Mustér. Cunquei ch’ igl uestg Georgius Schmid de Grüneck veva aunc da cresmar a Sedrun ed il chor era gest pinaus per ir a fiasta da cant, ein ils cantadurs semess sper via principala ed han cantau cura ch’ igl uestg ei ius sperasvi. Lez hagi teniu la crotscha, seigi ius vi tiel dirigent e priu la bitgetta ord maun. Cun sia vusch seigi el staus el cass da cuvierer gl’ entir chor. Sch’ il chor vessi giu cantau alla fiasta da cant quei medem di tenor igl uestg, vessi quei franc dau silmeins dus tschupi­als da ruver!
Igl atun 1954 ei la nova casa da scola a Segnas stada finida. Per il di dall’ inauguraziun ha il chor baselgia ensemen cun la giuventetgna ed ils affons cantau ina “cantata” da Duri Sialm cun in text dil dirigent dil chor Victor Durschei. Quella cantata ei vegnida registrada dil ra­dio dalla svizra tudestg e retoromontscha. Ei setracta cheu dall’ em­prema registraziun ch’ ei vegnida fatga cul chor da Segnas.
Fiastas da cant sebrattan cun fiastas profanas ed ecclesiasticas ed aschia varga il temps. 2017 astga il Chor Baselgia Segnas festivar siu 100avel anniversari. 32 cantadurs, tgamunai dad ina dirigenta ed in dirigent, embelleschan aunc oz ils survetschs divins a Segnas, e per part en pleiv, e dattan colorit a fiastas profanas. Tgisà sch‘igl interess da fundar in tal chor existess aunc oz? La finamira dil chor vein nus cumplettau avon paucs onns culla finamira ch’ il chor deigi esser ina puseivladad da sentupar e tgirar la cumpignia. Il cant daventa meins impurtonts, esser denton commember survegn tonpli muntada el temps da hectica ed individualitad d‘ozildi.

Da Gion Tenner / 1-01-16