Chor Baselgia s.Gions

100 onns Chor-baselgia s. Gions Mustér

Il Chor-baselgia s. Gions Mustér ha grond plascher d’astgar cooperar cun cantar messa la dumengia tier il survetsch divin sin Claustra a caschun dalla 17. Fiasta federala dall’Uniun d’accordeon svizra. El rom da quella celebraziun vegn era la nova bandiera da questa Uniun inaugurada.

Atgnamein ha il Chor-baselgia da s. Gions in semegliont intent sco l’Uniun d’accordeon dalla Svizra. Omisduas formaziuns sedattan gronda breigia da harmonisar e perfecziunar lur preparaziuns per producziuns. Ferton ch’ils accordeonists vulan primarmein delectar il publicum cun musica concertanta – ed a Mustér tier la fiasta era en concurrenza – han ils cantadurs en mira dad embellir la liturgia eucaristica cun edificar la cuminonza cartenta.

Per il Chor-baselgia da s. Gions a Mustér croda quella cooperaziun gest era el program da siu giubileum sin 100 onns. Fundaus 1916, vegn quel commemoraus festivamein e duidamein quest atun. Il Chor astga daveras giubilar cun gronda satisfacziun. El sa numnadamein mirar anavos sin ina activitad centenara senza interrupziun. Igl archiv dil Chor, pleins da cudischs da cant gregorian ed ecclesiastic, da numerusas partituras da messas cantadas, offertoris e motettas en grond diember, dat perdetga d’in considerabel repertuar e liung engaschi plein ideal e cardientscha. Biars fideivels, perschuadi e premurai cantadurs, sut la direcziun da capavels dirigents ed accumpignai da cumpetents organists, han realisau el decuors da 100 onns ina considerabla ed admirabla prestaziun cantica-musicala per Diu ludar ed ils fideivels legrar. Ina biala missiun. Da cuntinuar.

Erwin Caminada, president